FANDOM


Verbos en elefen es multe simple. Los ave sola tre tempos e un moda nonreal. Diferes plu sutil es espresada par averbos o par la situa.

TemposEdit

PresenteEdit

La verbo simple ave un sensa presente. El indica un ata ce coesiste con un punto de refere. Normal, la punto de refere es simple la momento de parla:

  • Me come. – Cuando me dise esta frase, me es comente.

La coesiste pote aplica a la periodo jeneral en cual on parla, an si el no aplica a la momento esata de parla. A esta modo, on indica atas abitual:

  • Me labora en un boteca. – En esta periodo de me vive, me es empleada en un boteca, an si me dise esta frase cuando me senta sur un plaia en vacanse.

FuturEdit

Si on pone la paroleta va ante la verbo, el deveni futur. El indica un ata ce aveni pos la punto de refere:

  • Me va come. – Cuando me dise esta frase, me no ia comensa come. La comensa de la come es ancora en la futur.

Va no es normal elejable. Si un ata es futur, on debe ajunta va a la verbo:

  • Me va labora doman. – No: Me labora doman.

Ma ave casos spesial do on ajunta va a un verbo xef, e esta dona un punto de refere futur a un verbo suordinada en la mesma frase.

Ance, cuando on lista verbos, on pote pone va ante sola la prima:

  • Me va come, bevi, e dansa. – Cada ata es futur.

PasadaEdit

Si on pone ia ante la verbo, el deveni pasada. El indica un ata ce aveni ante la punto de refere:

  • Me ia come. – Cuando me dise esta frase, la comensa de me come (e posable ance se fini) es en la pasada.

Ia no es normal elejable. Si un ata es pasada, on debe ajunta ia a la verbo. Ma, como con va, ave casos spesial.

Ance, cuando on lista verbos, on pote pone ia ante sola la prima:

  • Me ia veni, vidi, e vinse. – Cada ata es pasada.

Cuando un autor reconta un nara imajinada, el usa costumal verbos pasada, como si el descrive cosas ce ia aveni vera en la istoria. Ma esta es sola un costum, e on pote reconta egal bon con verbos presente. Verbos presente pote fa la reconta vive plu en la mente de la lejor o escutor. On pote an usa verbos pasada per la majoria de un reconta, e usa la presente per pasajes spesial vivos. Esta es un truco de stilo, no un cosa de gramatica.

Moda nonrealEdit

Alga frases parla de cosas nonreal: cosas ce no aveni en realia, ma sola en la mente. Per esemplo:

  • Me duta ce el pote leva la petra.
  • Me demanda a me si la tera es secur.
  • Si tu espera forte, posable tu sonias va deveni real!
  • Si me core, me va deveni fatigada.
  • Me desira ce tu canta gania la preso prima.
  • Me vole vola!

La nonrealia de tal cosas es bon indicada par si, o par parolas como duta, desira, espera, e vola. An va ave un sensa de nonrealia, car poca cosas futur es intera sin duta.

Ma, si on vole indica clar ce un aveni es nonreal, on pote ajunta la paroleta ta.

ImajinaEdit

La usa basal de ta es cuando on imajina un otra mundo en cual un o plu cosas es diferente:

  • Me ta es felis si la sol ta brilia. – Ma el no brilia.

Par se mesma, ta no indica si la ata es presente, futur, o pasada. Ma on aplica no plu ce un de va, ia, e ta a cada verbo. Donce, per parla de un ata pasada ce on imajina, on no dise ta ia. En loca, on ajunta espresas per clari la tempo, o on lasa la taxe a la situa:

  • Si tu ta dise acel ante du semanas, me no ta comprende alora. – La dise ia aveni (en la imajina) ante du semanas, e la noncomprende ia aveni a la mesma tempo.
  • Si tu ta dise acel alora, me no ta comprende. – La mesma sinifia.

Idiomal, on pote pone ia a un verbo e ta a la otra:

  • Si tu ia dise acel, me no ta comprende. – Denova la mesma sinifia. On usa asi ia per mostra ce la dise ia es pasada, e ta per crea un situa en cual on debe comprende acel pasada como sola imajinada.

On pote usa ance ja en tal frases.

DesiraEdit

Un otra usa de ta es per indica desiras. Car desiras es cosas imajinada, on pote espresa los con ta:

  • Me desira ce la re ta vive longa. – Me no sabe si la re va vive longa. Ma me desira esta.
  • La re ta vive longa! – Me esclama me desira.
  • Nos ta dansa! – Me esclama un otra desira.

On estende esta usa per espresa demandas cortes per aida:

  • Tu ta abri la porta, per favore? – Me desira ce tu abri la porta, e me espresa esta desira como un demanda.

ElejableEdit

Ta es elejable. On pote omete el si la contesto o la situa clari sufisinte ce on parla de un aveni nonreal:

  • Me desira ce tu encontra me ami. – La parola desira indica clar ce on parla de un cosa nonreal, e donce on no nesesa pone ta ante encontra.
  • El ia trova nun ci pote aida. – El ia desira ce algun ta aida el, ma el no ia trova un tal person, donce la aida ia resta clar nonreal, e on no nesesa pone ta ante pote.
  • Me duta ce tu crede me. – Me ia considera en me imajina la idea ce tu crede me, ma me ia rejeta el como nonprobable. Donce on pote regarda el como ancora imajinal, e on no nesesa pone ta ante crede.

Puntos de refereEdit

En parla, cuando on usa un verbo presente, el refere a la momento en cual la parla se mesma aveni. Simil, si on usa un verbo futur o pasada, estas refere a momentos en la futur o la pasada de la momento de parla.

Ma on pote crea ance un punto tempora de refere. Esta aveni cuando on reporta un dise o un pensa, sin sita direta la parolas. Un tal verbo ave la mesma tempo como la verbo en la sita direta:

  • Me dise ce me ia come. – En la momento de parla, me dise esta: "Me ia come." La come presede la dise.
  • Me ia dise ce me come. – A un tempo ante la momento de parla, me ia dise esta: "Me come." La dise e la come ia coesiste a acel tempo.
  • Me ia dise ce me ia come. – A un tempo ante la momento de parla, me ia dise esta: "Me ia come." La come ia presede la dise, e ambos ia presede la momento de parla.
  • Me crede ce tu va come. – En la momento de parla, me crede esta: "Tu va come." La come segue la crede.
  • Me va crede ce tu come. – A un tempo pos la momento de parla, me va crede esta: "Tu come." La crede e la come va coesiste.
  • Ia pare ce me come. – Ante la momento de parla, ia ave un ilude espresable a esta modo: "Me come." La pare e la come ia coesiste.
  • Ia pare ce me ia come. – Ante la momento de parla, ia ave esta ilude: "Me ia come." La come ia presede la pare, e ambos ia presede la momento de parla.
  • Ia es posable ce me va cade. – Ante la momento de parla, ia ave esta posable: "Me va cade." La cade va aveni (posable) en la futur, ma la esiste de la posable se mesma ia presede la momento de parla.
  • Tu ta dise ce tu ia comprende la libro? – Me desira ce tu va responde esta demanda: "Tu ia comprende la libro?" La comprende presede la demanda e la responde.
  • Tu ta dise ce tu ama me? – Me desira ce tu va responde esta demanda: "Tu ama me?" La ama coesiste con la demanda e la responde.
  • Tu ta dise ce tu va ama me? – Me desira ce tu va responde esta demanda: "Tu va ama me?" La ama segue la demanda e la responde.

PerfetaEdit

On pote imajina multe atas a du modos:

perfeta
Como un punto simple, sin distingui la comensa e la fini.
nonperfeta
Como un linia con un strutur interna en cual otra cosas pote aveni.

La forma basal me come no indica si la ata es un punto o un linia.

-nteEdit

Si on ajunta la sufisa -nte a un verbo, on cambia la verbo a un ajetivo ce sinifia "en un state do la ata de la verbo ia comensa ma no ia fini". El presenta la ata como un linia. La ator "move" longo la linia en tempo, de la comensa a la fini.

  • No velia la can dorminte. – La can ia adormi, e el no ia velia ancora.
  • Me es comente. – A la momento de parla, me ia comensa come ma no ia fini. La sinifia es me come, ma me asentua ce la ata aveni ancora. Me es a alga punto en la media de me come.

La ajetivo -nte no cambia se sinifia, an si la verbo ce el acompania es pasada, futur, o nonreal. Sola se punto de refere cambia:

  • Me ia es comente cuando tu ia telefoni. – A un tempo ante la momento de parla, tu ia telefoni e ia interompe me en media de me ata de come.
  • Sin duta, me va es denova comente cuando tu va telefoni. – Me suposa ironios ce un tempo va veni pos la momento de parla, en cual tu va telefoni e me va es denova en media de me ata de come.

Con un cuantia peti de verbos, on usa la strutur es -nte sola car la verbo simple no esiste comun en otra linguas relatada:

  • La problem es importante. – Ma egal bon: la problem importa. Simon

JaEdit

Ja es un averbo ce sinifia "a un tempo ante la punto de refere".

Cuando el acompania un verbo pasada, ja indica ce la ata ia fini ante acel punto:

  • Cuando me ia ave des anios, me ia aprende coce. – La aprende aveni en la anio des-un de me vive.
  • Cuando me ia ave des anios, me ia aprende ja coce. – La aprende comensa e fini en un anio plu temprana. Esta coresponde a la tempo "pasada perfeta" en alga linguas.
  • Cuando la enfantes ave des anios, los aprende coce. – Los aprende coce (abitual) en se anios des-un (a esta scola, per esemplo).
  • Cuando la enfantes ave des anios, los ia aprende ja coce. – La aprende comensa e fini (abitual) en un anio plu temprana. Esta coresponde a la tempo "presente perfeta" en alga linguas.

En multe casos, ja servi per obliga comprende la ata como un punto:

  • Me ia leje tu libro. – On pote imajina la leje egal como un punto o un linia. La difere no es importante.
  • Me ia es lejente tu libro. – La leje es clar un linia en cual on pote dise ce otra atas aveni ance.
  • Me ia leje ja tu libro. – La leje es clar un punto. La fato ce el ia ave un comensa e un fini no es pertinente.

La sinifia de ja cambia poca cuando on pone el a un verbo presente, car (en nos persepi) nos mesma es asi – en la presente con la ata. Alora, ja indica ce la ata ia comensa ante la punto de refere, ma ce el no ia fini ancora. Esta es multe simil a la sinifia de -nte, ma si -nte asentua un situa en media de la ata, ja asentua la cambia ce ia aveni a la comensa de la ata:

  • La sol es ja a la orizon. – La sol es aora a la orizon car el ia move ala a un tempo presedente.
  • Tu desira un poma? No, me come ja un banana. – Me es ocupada en come un banana car me ia comensa come el a un tempo presedente.
  • Me parla ja portuges. – Me es capas de parla portuges car me ia aprende el a un tempo presedente.
  • Me abita ja asi per cuatro anios. – Me abita asi car me ia veni asi ante cuatro anios e no ia vade a via en la tempo interveninte.

Con verbos futur e nonreal, ja es min comun, ma el opera como en la pasada. El indica ce la ata comensa e fini a un tempo futur (o nonreal) ce presede la punto de refere (ce es ance futur o nonreal):

  • Cuando me va ariva, me va come ja. – A un tempo pos la momento de parla, me va comensa e fini un come. E pos acel (posable no direta a pos), me va ariva.
  • An si tu ta esplica ja la problem, me no ta comprende el. – Me imajina me en un state de noncomprende an pos la fini de tu esplica (ance imajinada).

A veses, on trova ja en la strutur es ja -nte. Asi, ja descrive la ajetivo, no la verbo, e donce la sensa presente domina:

  • Me es ja lejente tu libro. – A la momento de parla, me es en un state lejente car me ia comensa leje. (= Me leje ja tu libro)
  • Me ia es ja lejente tu libro. – A un tempo ante la momento de parla, me ia es en un state lejente, car me ia comensa leje a un tempo an plu temprana. (no la mesma como: Me ia leje ja tu libro)
  • Me va es ja lejente tu libro. – A un tempo pos la momento de parla, me va es en un state lejente, car me va comensa leje entre la momento de parla e acel tempo futur. (no la mesma como: Me va leje ja tu libro)

-daEdit

Si on ajunta la sufisa -da a un verbo, on produi un ajetivo ce on pote aplica a la ojeto de la verbo per sinifia "en un state en la aveni de la ata, o en un state pos la fini de la ata". La situa sufisi comun per distingui la du sinifias, ma on pote ajunta parolas como aora e ja per sujesta plu clar un interprete:

  • La gato ia es amada par me tia. – A la tempo pasada de cual on parla, me tia ia ama la gato.
  • La fenetra es rompeda. – On ia rompe la fenetra, donce el es aora en un state mal.
  • La casa es bateda par la venta. – Ambigua, ma la situa tende clari.
  • La casa es aora bateda par la venta. – La venta es batente la casa.
  • La casa deveni bateda par la venta. – La venta es batente la casa.
  • La casa es ja bateda par la venta – La venta ia bate la casa, donce la casa es aora en un state mal.

Notas variosEdit

La ajetivos formida par -nte e -da no es un parte de la conjuga de la verbo. La verbo es es, per esemplo, e la ajetivos es simple ajetivos. Simil, ja no es un parte de la conjuga de la verbo. El es simple un averbo con un sinifia de tempo.

On no usa va, ia, e ta en media de un cadena de verbos. Donce on no dise me predise tu va veni, ma me predise tu veni o me predise ce tu va veni.

Community content is available under CC-BY-SA unless otherwise noted.