FANDOM


Un proposa suordinada (o suproposa) es un proposa peti ce partisipa en un otra proposa plu grande (la conteninte).

Introdui Edit

Locas de proposas suordinada Edit

Multe frecuente, un proposa suordinada es situada a fini de se conteninte:

  • Me pensa ce la vive es bon.
  • Tu demanda cuando nos va come.
  • El es un om ci me no conose.
  • Nos pote aida si tu desira.
  • Los come la ceso car los es fama.

Un proposa suordinada pote situa ance a comensa:

  • Ce la vive es bon es un filosofia felis.
  • Cuando nos ariva, me va dormi.
  • Si la parola es en la disionario, el es bon.

O el pote situa a media de la conteninte:

  • La pensa ce la vive es bon es felisinte.
  • Un fem ci me no conose sta a la porte.

Un proposa suordinada pote conteni un otra proposa suordinada:

  • Me espera ce la fem ci sta a la porte crede ce la vive es bon.

Spesies de proposas suordinada Edit

On pote clasi un proposa suordinada par se rol en la conteninte:

  • El pote jua la rol de un nom. Me pensa ce la vive es bon. "Ce la vive es bon" es la cosa ce me pensa.
  • El pote jua la rol de un ajetivo. El es un om ci me no conose. "Ci me no conose" descrive la om. Esta spesie es nomada un proposa relatal.
  • El pote jua la rol de un averbo. Nos pote aida si tu desira.

Ce, ci, cual Edit

Ce Edit

Multe proposas suordinada comensa con la parola "ce" (o con un espresa conteninte el, como "contra ce").

"Ce" ave sinco usas diferente:

  • Ajetivo de demanda per cosas: Ce cosa es acel? Me demanda a tu ce cosa es acel. (suproposa como nom)
  • Pronom de demanda per cosas: Ce es en la caxa? Me demanda a tu ce es en la caxa. (suproposa como nom)
  • Junta cual indica suproposas nomal: Me espera ce la animal dormi. (suproposa como nom)
    • Como caso spesial, pos un ajetivo o averbo usada con "tan", la suproposa con "ce" indica la state resultante: El es tan peti ce me no pote el vide.
  • Junta de compare: La animal es plu bela ce me ia imajina. (suproposa como averbo)
  • Preposada de compare: Tu es plu alta ce mi.

Ci Edit

"Ci" ave du usas:

  • Pronom de demanda per persones: Ci es tu? Tu no dise a me ci tu es. (suproposa como nom)
  • Pronom relatal per persones: La enfante ci cade no es ferida. (suproposa como ajetivo)

Cual Edit

"Cual" ave tre usas gramatical:

  • Ajetivo de demanda per elejes: Cual libro tu leje? Me no sabe cual libro tu leje. (suproposa como nom)
  • Pronom de demanda per elejes: Cual de esta libros parteni a tu? Me oblida cual parteni a tu. (suproposa como nom)
  • Pronom relatal per cosas: Me toca la animal misterios cual dormi en la caxa. (suproposa como ajetivo)

Proposas suordinada e pronomes relatal Edit

Un proposa relatal descrive alga cosa en se conteninte. La pronom relatal representa acel cosa en la proposa suordinada.

La pronom relatal es "cual" per cosas e "ci" per persones.

Los pote es la sujeto de la suproposa:

  • Me gusta la libro cual es sur la table.
  • Me no conose la om ci leje la libro.

Los pote es la ojeto de la suproposa:

  • Me regarda la libro cual la om leje.
  • La fem ci me regarda es blonde.

E los pote es la ojeto de un preposada en la proposa suordinada:

  • La caxa en cual la animal dormi no es grande.
  • La om a ci me presta me auto ia es un furor.

Un suproposa relatal descrive alga cosa en la conteninte. La descrive pote es esensal o nonesensal. Jeneral, nos pone virgulas sirca un proposa suordinada relatal nonesensal:

  • Esensal: La serpente cual es en la caxa es demente. (La proposa suordinada identifia un serpente. Posible un otra serpente es en la situa, ma no en la caxa.)
  • Nonesensal: La serpente, cual es en la caxa, es demente. (Nos conose ja la serpente. La informa ce el es en la caxa es interesante ma no multe importante.)

Un pronom relatal pote relata a un otra pronom en la conteninte:

  • El ci osa va gania.
  • Me ave tro libros: me va dona a tu los cual me no nesesa.

Un pronom relatal pote relata a la tota frase presedente, ma frecuente plu clar es la usa de un pronom de indica, como "esta" o "acel":

  • Me ia gania la loto, cual es multe plasente.
  • (Me ia gania la loto, cual es un spesie de jua.)
  • Me ia gania la loto, e acel es multe plasente.

Preposadas con "ce", "cual", e "ci" Edit

Car "ce", "cual", e "ci" pote es pronomes, nos pote usa los como ojetos de preposadas.

Pronomes de demanda:

  • Per ce tu dise acel? Me no comprende per ce tu dise acel.
  • A ci me debe dona la clave? El no sabe a ci el debe dona la clave.
  • La table es fada de ce? Tu demanda de ce la table es fada.
  • La table es fada par ci? Me informa a tu par ci la table es fada.

Pronomes relatal:

  • La can a cual me dona me mano atenta come el.
  • La person per ci tu ia vota es stupida.

Cuando, do, como, cuanto Edit

Cuando Edit

"Cuando" ave tre usas diferente:

  • Averbo de demanda per tempo: Cuando nos va come? La enfante demanda cuando nos va come. (suproposa como nom)
  • Averbo relatal per tempo: En la anio cuando me nase la clima es multe calda. (suproposa como ajetivo: el descrive la anio)
  • Junta per tempo: Me va dormi cuando nos ariva. (suproposa como averbo)

Do Edit

"Do" ave tre usas, esata como "cuando":

  • Averbo de demanda per loca: Do es la can? Me no sabe do es la can. (suproposa como nom)
  • Averbo relatal per loca: En la pais do me nase la clima es multe calda. (suproposa como ajetivo: el descrive la pais)
  • Junta per loca: Me va dormi do me sta. (suproposa como averbo)

Como Edit

"Como" ave cuatro usas:

  • Averbo de demanda per modo: Como tu conose me nom? Me no comprende como tu conose me nom. (suproposa como nom)
  • Averbo relatal per modo: La manera como tu pronunsia acel parola es riable. (suproposa como ajetivo: el descrive la manera)
  • Junta per modo: Me parla como me pensa. (suproposa como averbo)
  • Preposada de modo: Acel om pare como un agila.

Cuanto Edit

Cuanto ave tre sensas, e la prima ave du usas gramatical:

  • Ajetivo de demanda per cuantia: Cuanto acua es en la balde? Me no desira sabe cuanto serpentes es en la caxa. (suproposa de nom)
  • Averbo de demanda per cuantia: Cuanto va veni? La botecor ia dise cuanto costa la orolojo. (suproposa de nom)
  • Averbo relatal per cuantia: Tu pote dormi a la grado cuanto tu desira. (suproposa como ajetivo: el descrive la grado)
  • Junta per cuantia: Tu pote dormi cuanto tu desira. (suproposa como averbo)

Juntas o averbos relatal? Edit

"Cuando", "do", "como" e "cuanto" es usada como juntas. Ma on pote esplica esta como un caso spesial de se usas como averbos relatal, si on ajunta imajinal un parola mancada:

  • Me va dormi cuando nos ariva. = Me va dormi alora cuando nos ariva. La proposa suordinada descrive "alora".
  • Me va dormi do me sta. = Me va dormi ala do me sta. La proposa suordinada descrive "ala".
  • Me parla como me pensa. = Me parla a acel modo como me pensa. La proposa suordinada descrive "modo".
  • Tu pote dormi cuanto tu desira. = Tu pote dormi a la grado cuanto tu desira. La proposa suordinada descrive "grado".

Con preposadas Edit

Car "cuando", "do", "como" e "cuanto" pote introdui un proposa suordinada ce jua la rol de un nom, nos pote usa acel proposa como ojeto de preposada.

Cuando:

  • Nos va dansa pos cuando nos canta. Nos va canta a comensa, e pos la canta nos va dansa.
  • Nos va canta ante cuando nos dansa. La mesma.
  • Nos va dansa asta cuando nos adormi. Cuando nos adormi, nos dansa va para.
  • Me pensa en cuando me dormi. Me pensa en me dormi.
  • Me abita asi de cuando me nase. Me ia abita sempre asi.

Do:

  • Me vade a do tu es.
  • Me veni de do tu es.
  • La polisior ia desinia un sirculo sirca do el trova la clave.

Como:

  • Tu descrive difere multe de como la loca pare en realia.

Cuanto:

  • Me va paia tu per cuanto oras tu labora.

A esta casos, la preposada governa la tota proposa suordinada. Acel difere multe de la condui de un preposada con un pronom relatal, do la preposada governa sola la pronom:

  • Nos va fa un dansa pos cuando nos canta. Nos va canta a comensa, e pos la canta nos va dansa.
  • Nos va fa un dansa pos cual nos va canta. Nos va dansa a comensa, e pos la dansa nos va canta.

Otra juntasEdit

Otra juntas pote introdui proposas suordinada con sinifias spesial.

"Afin" introdui un proposa suordinada ce mostra un resulta intendeda. La preposada corespondente es "per". ("Per ce" es un espresa de demanda, o el introdui un proposa relatal.)

  • El veni a la fenetra afin nos ta pote parla a el, ma el no susede abri la fenetra. (suproposa como averbo)
  • Me vade a la fenetra per regarda la vista.

"Car" introdui un proposa suordinada ce mostra un causa o un motiva o un razona. La preposada corespondente es "par causa de".

  • El clui la fenetra car el no gusta la ruido de trafica. (suproposa como averbo)
  • El clui la fenetra par causa de la ruido.

"Si" introdui un proposa suordinada ce mostra un state o caso de ce la conteninte depende. Cuando un proposa suordinada con "si" sta a la comensa de se conteninte, on pote ajunta "donce" pos la suproposa per asentua la depende.

  • Me va sta en me casa si pluve forte. (suproposa como averbo)
  • Si tu crede ce la mundo es plata, donce tu es multe strana. (suproposa como averbo)

"Si" es ance usada per introdui un demanda nondireta, de cual la responde es "si" o "no". El es simil a "ce", cuando "ce" es un junta sin sinifia spesial: "ce" es per fatos; "si" es per demandas.

  • Me demanda a me si la pluve va para. (suproposa como nom)
Community content is available under CC-BY-SA unless otherwise noted.