FANDOM


Capitol 1
Cual trata de la carater e xasa de la senior famosa Don Quijote de la Mancha
Scriveda par Chabi

En un vileta de La Manga, de cual me ave no desira de recorda sua nom, a no multe tempo ante aora, un senior ia abita de acel spesie ci garda un lansia en la portalansia, un peti scermo vea, un cavalo magra, e un lepror per corsa. Un vaso de carne alga plu de bove ca de ovea, un salada a la plu de seras, duelos y quebrantos[1] a saturdis, lentiles a venerdis, e un pijon plu a la soldi, ia consuma tre cuatris de sua revenu. La resta de lo ia desapare contra un jaca de stofa amirable e un pantala de veluda con sapatos corespondente per festas, e en dias de semana el ia presenta un figur corajosa en sua vestes la plu bon, texeda a casa. El ia ave en sua casa un manejor con plu ca cuatrodes anios, un sobrina con min ca dudes, e un xico per la campo e la mercato, ci ia tende ensela la cavalo e maneja ance la desramador. La eda de esta nosa senior ia es sirca sincodes; el ia es de un aspeta forte, con corpo e fas magra, matinor e ami de xasa. Los va ave sua nom familial como Quixada o Quesada (ce on ave alga difere de opina entre la autores ci scrive sur esta tema), an si par divinas razonante lo pare ce el ia es nomida Quexana. An tal, esta es de poca importa per nosa nara, lo va sufisi ce nos nos separa la min de la veria cuando nos nara lo.

Es, alora, de sabe ce esta ante refereda senior, la momentos ce el ia es osiosa, ce lo ia es la plu parte de la anio, el ia dedica a leje libros de cavaloria con tan zelo e gusta, ce ia descura casi tota la eserse de la xasa e an la maneja de sua poseses; e lo ia ariva a tan sua curiosia e osese en esta, ce el ia vende multe acres de tera de cultiva per compra libros de cavaloria per leje, e tal, el ia porta a sua casa tota cuanto el ia pote oteni. Ma on ia ave nun cual el ia ama plu ca acel de Feliciano de Silva, car sua claria de stilo e consetas complicada ia pare perlas a el, e plu cuando el ia leje acel corteas e leteras de defia, do el ia frecuente trova scriveda: La razona de la nonrazona con cual mea razona es doleda, tal debili mea razona cual con razona me cexa de tua belia. E ance cuando el ia leje: "la sielos alta, cual de vosa divinia divin forti vos con la stelas, e fa ce vos merita la merita cual vosa eselentia merita".

Con esta consetas la senior povre ia perde sua astutia, e el ia resta veliada atentante comprende los e dona los sensa; alga cosa ce no ta fa an Aristotele, si el ta revive sola per esta. El no ia felis con la feris cual Don Belianís ia dona e ia reseta, car el ia imajina ce, an si multe grande ia es la sirurjistes ci ia cura el, el ia debe ave sua fas e corpo tota covreda con costures e sicatrises. An tal, el ia loda la forma con cual la autor ia fini sua libro, con la promete de acel aventura nonfininte, e a multe veses el ia es tentada de prende la pluma e fini lo como ala es proposada, cual sin duta el ia ta fa, e ia ta crea un obra susedosa, si el no ta ave pensas plu grande e plu asorbente cual ia impedi el.

Notas

  1. Plato tradisional de La Manga, de cual la ingredientes es ovo bateda, txoriso e lardo.
Community content is available under CC-BY-SA unless otherwise noted.