FANDOM


Disionario de mitolojia clasica
Scriveda par Chabi
Coretida par Simon


Esta obra es ance disponable como pdf.

Prefasa Edit

La Disionario de Elefen defini mitolojia como “un colie de mitos, tipal parteninte a un tradision relijial o cultural” e “la studia de mitos”. En esta disionario, nos intende grupi la nomes xef de la mitolojia clasica, pd la mitolojia elinica e roman; acel nomes formi un parte de la tradision relijial o cultural de la Mar Mediteraneo antica, e los es du de la tre colonas sur cual la cultur european reposa (cristianisme es la colona tre). Esta es car la influe de la mitos elinica e roman pote es sentida an oji (esemplos de esta es, per esemplo, la filma Troia) e on pote vide como esta mitos es presente en la istoria de arte car los ia dona a la artistes un fonte nonconsumable de ideas per depintas e scultas, per libros, filmes e animas.

Cisa con esta libro, los ci vole aprende plu sur esta cultures tra sua conseti relijial pote fa lo en lingua franca nova. Car nosa lingua es un lingua desendente de la linguas romanica, lo es un fia nondireta de latina e esta mitolojia es un parte de sua erita cultural.

Introdui Edit

En esta disionario vos va trova sola du cortis: LA per refere a “lingua latina” e EL per refere a “lingua elinica”. Ambos es usada per indica como esta dios ia es nomida en un lingua o en la otra.

Per transcrive la nomes elinica, nos ia usa regulas fundida sur los usada par latina e par linguas romanica, ma armoninte los con la regulas de ortografia de elefen.

Α A
Β B
Γ G
Δ D
Ε E
Ζ Z
Η E
Θ T
Ι I
Κ C
Λ L
Μ M
Ν N
Ξ X
Ο O
Π P
Ρ R
Σ S
Τ T
Υ I
Φ F
Χ C
Ψ PS
Ω O


ʽ H
ΑΙ E
ΕΙ E
ΟΙ E
ΟΥ U
ΓΓ NG
ΓΚ NC
ΓΞ NX
ΓΧ NC

La plu de nomes propre elinica cual fini con -ος, -ας, e -ης perde la -ς, e -ευς deveni -eo. Per esemplo, Αἰνείας deveni Enea. La esetas es Acile, Ares, Atlas, Caos, Edipo, Eos, Eros, Hades, Hermes, Minos, Palas e Zeus. Otra finis (incluinte -ις) es retenida.

En nomes latina, ch, k e q deveni c; ph deveni f; rh deveni r; th deveni t; ae, ei e oe deveni e; y deveni i'; e la i' e u consonantal deveni j e v. La finis -us e -um deveni -o; -as e -es perde la -s como en nomes elinica; la esetas es Ceres e Venus.

Leteras duple (incluinte la vocales) deveni singular.

Mapas Edit

Elas homeral

Mapa de Elas en la tempo de Homero.

Viaja de Odiseo

Viaja de Odiseo per reveni a sua casa.

Esclui de Enea

Viaja de la esclui de Enea de Troia asta ariva a Italia.

Argonautas

Viaja de la argonautas a Colcis per prende la Lana de Oro.

A Edit

  • Abdero (EL Ἄβδηρος) — El ia aida Hercule en sua taxe oto e ia es matada par la cavalos fema de Diomede.
  • Aca Larentia (LA Acca Larentia) — Sposa de Faustulo. Los ia eleva Romulo e Remo pos cuando sua sposo ia trova la enfantes con la lupo fema.
  • Acama (EL Ἀκάμας) — Fio de Fedra e Teseo, un de la elinicas ci ia es en la cavalo de Troia.
  • Acaste (EL Ακαστη) — Un de la oceanides. El ia es entre la acompaniores de Persefone en Sisilia cuando el ia es saisida par Hades.
  • Acate (EL Ἀχάτης) — Un eroe troian, ami de Enea, ci ia acompania el en sua viaja a Italia. El ia mata Protesilao, la elinica prima ci ia desembarca en Troia.
  • Aceron (EL Αχέρων) — Un de la sinco rios de enferno.
  • Acile (EL Ἀχιλλεύς) — Un eroe de la gera de Troia, e la fio de Tetis e Peleo. Sua madre ia bani el en la Rio Stix, teninte el a la talon, e donce el ia deveni nonmortal con eseta de sua talon. El ia mori cuando Paris ia lansa un flexa a el, gidada par Apolon.
  • Aciroe (EL Ἀχιρ(ρ)όη; ance nomida Ancinoe Ἀγχινόη) — Fia de la dio-rio Nilo e sposa de Belo. Madre de Danao e Egipto.
  • Acteon (EL Άκταίων) — Un eroe e xasor teban, conoseda car el ia vide Artemis nuda baninte se. Per puni el, la diva ia cambia el a un servo cual sua canes de xasa ia devora.
  • Adastrea (EL Ἀδράστεια) — Un nimfa critica, fia de Meliseo, encargada a cura secreta la enfante Zeus per proteje el de sua padre Crono.
  • Admete (EL Ἀδμήτη) — Un de la oceanides. El ia es entre la acompaniores de Persefone en Sisilia cuando el ia es saisida par Hades.
  • Admeto (EL Ἄδμητος) — Re de Fere (EL Φεραί) — E sposo de Alcestis.
  • Adonis (EL Άδωνις) — La amor mortal de Afrodite. El ia mori en la manos de Afrodite, lansida par un senglar enviada par Artemis.
  • Afrodite (EL Ἀφροδίτη) — La diva elinica de ama.
  • Agamemnon (EL Ἀγαμέμνων) — Re de Micene e comandor de la armada acean en la gera de Troia.
  • Aganipe (EL Ἀγανίππη) — Un crenea de la fonte Aganipe.
  • Agave (EL Ἀγαύη) — Fia de Cadmo e Harmonia, prinsesa de Tebas, sposa de Ecion e madre de Penteo e Epiro.
  • Agenor (EL Ἀγήνωρ) — Re fenisia de Tiro. Fio de Posedon e Libia, sposo de Telefasa e padre de Fenix, Cilix, Cadmo, Europa e Fineo.
  • Aiax maior (EL Αἴας ὁ Τελαμώνιος) — Fio de la re Telamon e Periobea, duifrate de Telamon. El ia combate en la gera de Troia.
  • Aiax minor (EL Αίας ο Λοκρός) — Ance conoseda como Aiax Oileo, fio de Oileo, re de Locris. El ia combate per la aceanes en la gera de Troia.
  • Alba Longa — Un site fundida par Ascanio.
  • Alcestis (EL Ἄλκηστις) — Un prinsesa, fia de Pelia e Anaxibia, famosa per sua ama a sua sposo, la re Admeto.
  • Alcimede (EL Ἀλκιμέδη) — Madre de Iason e Promaco e sposa de Eson.
  • Alcioneo (EL Ἀλκυονεύς) — Un jigante, fio de Gea e de la sangue de Urano castrada, matada par Heracle.
  • aloades (EL Ἀλωάδαι) — Du jigantes, Oto e Efialte, fios de Ifimedia, sposa de Aloeo, e Posedon. Forte e violente, ambos ia vole sposi Artemis, ci ia converti se a un servo e ia salta entre los. Desirante ce el no fuji, los ia lansa sua lansias e ia mata lunlotra.
  • Amaltea (EL Ἀμάλθεια) — La madre tempora adotante de Zeus la plu notada, frecuente representada como la capra ci ia teti la dio-enfante en un cava en un monte.
  • amazona (EL Ἀμαζών) — Un membro de un raza mital de gerores fema.
  • ambrosia (EL ἀμβροσία) — La comeda prefereda de la dios elinica antica
  • Amfitrion (EL Ἀμφιτρύων) — Un jeneral teban ci ia salva Tebas de la volpe teumesian. Sposo de Alcmena, madre de Hercule.
  • Amfitrite (EL Αμφιτρίτη) — Un diva maral e sposa real de Posedon.
  • Anax (EL Αναξ) — Un jigante de la isola Lade prosima a Miledo en Lidia, Anatolia.
  • Ancinoe (EL Ἀχιρ(ρ)όη / Ἀγχινόη) — Un naiade, fia de la dio-rio Nilo, sposa de Belo e madre de Egipto e Danao.
  • Ancise (EL Ἀγχίσης) — La padre de Enea.
  • Andromace (EL Ανδρομάχη) — La sposa de Hector.
  • Andromeda (EL Ανδρομέδα) — Un prinsesa itiopian, fisada a un roca asta cuando Perseo ia salva el.
  • Angelo (EL Ἄγγελος) — Un fia de Zeus e Hera ci ia deveni un diva de la sumundo.
  • Antenor (EL Ἀντήνωρ) — Un conselor de la re Priamo en la gera de Troia.
  • Anteo (EL Ἀνταῖος) — Un jigante libi ci ia mata tota visitores par combate. El ia es matada par Heracle.
  • Antifate (EL Ἀντιφάτης) — La re de la lestrigones, jigantes ci ia come omes e ci Odiseo ia encontra en sua viajas.
  • Antigona (EL Ἀντιγόνη) — Fia de Edipo e sua sposa Iocasta, ci ia defia la re de Tebas, Creon, par entera sua frate Polinece.
  • Antiloco (EL Ἀντίλοχος) — Fio de Nestor ci ia sacrifia se per salva sua padre en la Gera de Troia.
  • Antiope (EL Ἀντιόπη) — Un amazona, saisida par Teseo cuando Heracle ia atenta prende la sintur de sua sore Hipolita.
  • Apolon (EL Ἀπόλλων) — La dio elinica de musica e divinia, de la sol, poesia, musica, e oraculos.
  • Aracne (EL Αράχνη) — Un texor fema destrosa, mutada a un arania par Atena par causa de sua blasfema.
  • Ares (EL Ἄρης) — La dio elinica de gera.
  • Arete (EL Ἀρετή) — Spirito de virtua, eselentia, bonia e coraje.
  • Aretusa (EL Αρετούσα) — Un fia de Nereo, mutada a un fonte.
  • Argo (EL Ἀργώ) — La barcon en cual Iason e la argonautas ia viaja de Iolco a Colchis per retrae la Lana de Oro.
  • Argo Panopte (EL Ἄργος Πανόπτης) — Un jigante con sento oios, encargada a garda Io.
  • Ariadne (EL Αριάδνη) — Fia de Minos, re de Creta, ci ia aida Teseo a vinse la Minotauro e ia deveni la sposa de Dioniso.
  • Artemis (EL Ἄρτεμις) — La diva elinica de la xasa, e protejor de virjines.
  • Asclepio (EL Ἀσκληπιός; Esculapio per la romanes) — La dio elinica de medica.
  • Atalante (EL Αταλάντη) — Un eroe fema ci ia partisipa en la xasa de la senglar calidonian.
  • Atena (EL Ἀθήνα) — La diva elinica de gerores e intelijentia.
  • Aventino (LA Aventinus) — Un fio de Hercule e la prinsesa Rea, un aliada de Mezentio e un enemi de Enea. El ia es asasinada e enterada en la colina cual porta sua nom.
  • alseides (EL Ἀλσηΐδες) — Nimfas de bosces e valetas.
  • Arcesilao (EL Ἀρκεσίλαος) — Un de la sinco capitanes de la beotianes ci ia aida Troia en sua gera contra la aceanes. Fio de Arelico e Teobule.
  • Aristeo (EL Ἀρισταῖος) — Fio de Apolon e la nimfa Cirene, sposo de Autonoe e padre de Acteon e Macri. Pos nase, el ia es elevada par la Musas, ci ia instrui el sur la eleva de abeas, la produi de ceso e modos per fa ce olivos dona olivas. El ia deveni la padron de boves, xasa, cultiva e eleva de abeas.
  • Ascalafo (EL Ἀσκάλαφος) — (1) Fio de Aceron. El ia vide como Persefone ia come en la Enfernos e ia informa Hades e Zeus. Demeter, per venja, ia lansa un petra sur el ma Heracle ia aida el par libri el de su lo. (2) Fio de Ares e Astioce, jemelo de Ialmeno. Corteor de Helena, el ia debe vade a la Gera de Troia, do el ia es matada par un flexa lansada par Deifobo.
  • Atama (EL Ἀθάμας) — Fio de Eolo e Enarete. El ia ave sposas diversa. Con sua sposa prima, Nefele, el ia ave du jemelos, Hele e Frixo e un otra fio, Macisto. Plu tarda, el ia sposi Ino, con ci el ia ave du fios Learce e Melicerte.
  • auloniades (EL Αὐλωνιάς) — Nimfas de pastos de montanias e vales ci ia acompania frecuente Pan.
  • Aura (LA Aura) — La personi de la venteta.
  • Automedon (EL Αὐτομέδων) — Fio de Dioreo, caror de Acile en la Gera de Troia. Pos la mori de Acile el ia aida sua fio Neoptolemo.
  • Autonoe (EL Αὐτονόη) — Fia de Cadmo e Harmonia. Sposa de Aristeo e madre de Acteon e Macri.

B Edit

  • Baco (EL Βάκχος, LA Bacchus) — Dio roman de vino, plaser sesal e veria.
  • Baticle (EL Βαθυκλῆς) — Un geror mirmidon tesalian, ci ia aida la aceanes en la Gera de Troia. El ia es matada par Glauco.
  • Belerofon (EL Βελλεροφῶν) — Un eroe mital, conoseda par causa de mata la cimera.
  • Belo (EL Βῆλος) — Re de Egipte e padre de Egipto e Danao. Sua sposa ia es nomida Aciroe.
  • Belona (LA Bellona) — Diva de gera.
  • Bentesicime (EL Βενθεσικύμη) — Fia de Posedon, ci ia abita en Itiopia.
  • Bon Diva (LA Bona Dea; ance nomida Fauna) — Diva de fertilia, cura, virjinia e femas.
  • Borea (EL Βορέας) — Dio de venta norde e de inverno.
  • boreades (EL Βορεάδαι) — Du frates, Calai e Zete, fios de Boreas, la venta norde.
  • Bove de Criti (EL Κρὴς ταῦρος) — Un bove mas. Pasifae, enamada par lo, ia pari la Minotauro. Hercule ia debe porta lo vivente a Euristeo en sua taxe sete.
  • Bubona (LA Bubona) — Diva roman de boves.
  • Brizo (EL Βριζώ) — Diva padronal de la marinores, ci ia envia sonias predisente.

C Edit

  • Cadmo (EL Κάδμος) — Re fenisia, fio de Agenor de Tiro. El ia es enviada per xerca sua sore Europa, e ia reveni con el, pos cuando Europa ia es saisida par Zeus. El ia fundi la site de Tebas e ia inventa la alfabeta elinica.
  • Calca (EL Κάλχας) — Un profeta potiosa elinica, ci ia gida la elinicas tra la gera con sua predises.
  • Caliope (EL Καλλιόπη) — Musa de bonparla e epica, madre de Orfeo e Lino.
  • Calipso (EL Καλυψώ) — Un nimfa ci ia abita sur la isola Ogigia, do el ia deteni Odiseo per sete anios.
  • Calisto (EL Καλλιστώ) — Un alseide, seguor de Artemis, seduida par Zeus. Cuando Artemis ia descovre ce Calisto es ensinta, Artemis ia espulsa el. Hera ia converti el a un urso ma, ante sua mori, el ia es convertida a la Urso Grande.
  • Campos Elisian (EL Ἠλύσια πεδία) — Loca de reposa de la spiritos de la eroes e la virtuosas.
  • Carmenta (LA Carmenta) — Diva de nase e profetas
  • Caos (EL Χάος) — La dio elinica de nonesiste, de cual tota cosas ia veni.
  • Caribdis (EL Χάρυβδις) — Monstro maral, fia de Posedon e Gea.
  • Caron (EL Χάρων) — Navetor de Hades ci ia transporta la spiritos de la mores tra la Rios Stix e Aceron cual separa la mundo de la viventes e la mundo de la mores.
  • Casandra (EL Κασσάνδρα) — Fia de la re Priamo e la rea Hecuba de Troia. El ia es maldiseda a fa predises cual nun va crede.
  • cavalos fema de Diomede (EL Διομήδους ἵπποι) — Cuatro cavalos fema ci ia come carne umana, poseseda par Diomede, re de Tracia. Hercule ia debe porta los a la re Euristeo en sua taxe oto.
  • Cerbero (EL Κέρβερος) — Un can con tre testas ci ia garda la entra a enferno.
  • Ceres (LA Cerēs) — Diva de recolie e la madre de Proserpina.
  • Ceto (EL Κῆτώ) — Diva de la periles de la mar e de la monstros maral.
  • Cibele (EL Κυβέλη) — Madre de la tera.
  • Cilix (EL Κίλιξ) — Fio de Agenor e Telefasa, enviada par sua padre per xerca Europa. El ia vade a Anatolia, do la pais Cilicia ia es nomida per sua nom.
  • Cimera (EL Χίμαιρα) — Un de la projenia de Tifon e Ecidna, un monstro con testa de leon, corpo de capra e coda de dragon.
  • Cimopolea (EL Κυμοπόλεια) — Un fia de Posedon, sposida con la jigante Briareo.
  • Cimotoe (EL Κυμοθόη) — Un de la nimfas de mar.
  • Circe (EL Κίρκη) — Un encantor fema ci ia converti la omes de Odiseo a porcos.
  • Cirene (EL Κῡρήνη) — Fia de Hipseo e Clinadope, madre de Aristeo, prinsesa tesalian e, plu tarda, renor e governor de la site de Cirene, en Africa norde.
  • Ciron (EL Χείρων) — Un sentauro vea e saja ci ia es la mestre de Acile.
  • Climene (EL Κλυμένη) — Un oceanide, sposa de la titan Ofion ci ia governa prima de Monte Olimpo. El ia es vinseda par Rea en un combate e ia es portada a Tartaro.
  • Clio (EL Κλειώ) — Musa de istoria.
  • Clitemnestra (EL Κλυταιμνήστρα) — Sposa de Agamemnon e rea de Micene.
  • Cocito (EL Κωκυτός) — Un de la sinco rios de enferno.
  • Concordia (LA Concordia) — Diva roman de acorda, comprende e armonia sposal.
  • creneas (EL Κρηναῖαι) — Nimfas liada a fontes.
  • Crono (EL Χρόνος) — La dio elinica de tempo eterna.
  • Cuirino (LA Quirīnus) — La dio ci ia representa la stato roman.
  • Cupido (LA Cupīdō) — Dio roman de ama. El coresponde a la dio elinica Eros.

D Edit

  • Dafne (EL Δάφνη) — Un naiade, fia de la dio-rio Peneo e la nimfa Creusa. Cupido ia enama Apolon a el. Dafne, persegueda par la dio, ia demanda per aida de sua padre, ci ia converti el a un lauro.
  • Damiso (EL Δάμυσος) — La plu rapida de tota la jigantes en la mitolojia elinica.
  • Danae (EL Δανάη) — Fia de la re Acrisio de Argo e de Euridice, madre de Perseo.
  • danaides (EL Δαναΐδες) — La sincodes fias de Danao. Los ia sposi la sincodes fios de Egipto, la jemelo de Danao. Tota estra un (Hipermnestra) ia mata sua sposos en la note de sposi e los ia es condenada a porta acua en un tamis tra eternia.
  • Danao (EL Δαναός) — Re de Libia. Fundor de la site de Argo. El ia es la fio de la re Belo de Egipte e la naiade Aciroe.
  • Dardano (EL Δάρδανος) — Fio de Zeus e Electra e fundor de la site de Dardano, a pede de Monte Ida.
  • Dedalo (EL Δαίδαλος) — Un artisan destrosa ci ia fabrica la alas de Icaro.
  • Deianera (EL Δηϊάνειρα) — La fem tre de Heracle, ci ia asasina sua sposo con la camisa de Neso sin sabe lo.
  • Deifobo (EL Δηίφοβος) — Fio de Priamo e Hecuba. Prinse de Troia, el ia sposi Helena pos la mori de Paris. Cuando Odiseo e Menelao ia ataca sua casa, los ia mutila el. A pos, el ia apare a Enea en la sumundo.
  • Deipiro (EL Δηΐπυρος) — Un geror ci ia aida la aceanes en la Gera de Troia. El ia es prima un vijilor e ia anima la aceanes cuando la troianes ia es prosima a la murones acean. El ia aida ance Idomeneo en sua combate contra Enea, ma Heleno ia mata el.
  • Delfi (EL Δελφοί) — Un santeria antica famosa, de cual sua oraculo ia es consultada sur desides importante tra la mundo clasica antica. La elinicas ia regarda Delfi como la sentro de la mundo.
  • Delfin (EL Δελφίν) — La gidor de la delfines. Posedon ia pone el en la sielo como la constela Delfin.
  • Demetra (EL Δημητρα; ance conoseda como Demeter, EL Δημήτηρ) — Diva elinica de fertilia.
  • Diana (LA Diana) — Diva de la xasa, la luna, virjinia, e nase, la sore de Apollo.
  • Dido (EL Δῑδώ) — Fundor e rea prima de Cartago. El ia deveni enamada par Enea cuando el ia ariva a la site.
  • Diomede (EL Διομήδη) — (1) Fio de Tideo e re de Argos. (2) Re de Tracia conoseda per sua cavalos fema.
  • Dioniso (EL Διόνυσος; ance nomida Baco) — La dio elinica de vino e la joia de seso.
  • Doris (EL Δωρίς) — Un oceanide, de ci sua nom representa la recolie de la mar. Fia de Oceano e Tetis e sposa de Nereo.
  • driades (EL Δρυάδες) — Nimfas de arbores ci ia nase de un arbor nomida “Arbor de la Hesperides”. Alga de los ia vade ala per proteje la pomas de oro cual ia es ala.

E Edit

  • Eaco (EL Αἰακός) — Re mital de la isola Egina.
  • Ecidna (EL Ἔχιδνα) — Un monstro partal fema e partal serpente, cual ia abita solitar en un cava. El ia es la spos de Tifon e la madre de la plu de monstros.
  • Ecion (EL Ἐχίων) — Un de la spartos, sposo de Agave e padre de Penteo e Epiro.
  • Edipo (EL Οἰδίπους) — Re mital de Tebas, ci ia vinse la sfinje, ia mata sua padre e ia sposi sua madre.
  • Edotea (EL Ειδοθέα) — La nimfa maral presidente e fia de Proteo.
  • Ejeo (EL Αἰγεύς) — Padre de Teseo, fundor de la instituidas de Atina e un de la res prima de Atina. El ia dona sua nom a la Mar Ejeo.
  • eleades (EL Ελειάδες) — Naiades de la pantanes.
  • Electra (EL Ἠλέκτρα) — Fia de la re Agamemnon e la rea Clitemnestra, prinsesa de Argo.
  • Encelado (EL Ἐγκέλαδος) — Un jigante matada par Atena. El ia es enterada su Monte Etna, en Sisilia.
  • Endeis (EL Ενδηίς / Ενδαΐς) — Sposa de Eaco e madre de Peleo e Telamon.
  • Enea (EL Αἰνείας) — Un eroe troian, fio de Ancise e Venus e padre de Ascanio. El ia fuji de Troia e ia viaja tra la Mar Mediteraneo asta ariva a Italia. El ia es la asendente de la romanes.
  • Eolo (EL Αἴολος) — Un re de Tesalia, asiniada como re nonmortal de tota la ventas par Zeus.
  • Epimelide (EL Επιμηλιδες) — Driades ci ia cura la pomos. Los ia proteje ance oveas e capras. Esta nimfas ia proteje la Lana de Oro.
  • Epiro (EL Ήπειρος) — Fia de Agave e Ecion. El ia acompania Cadmo e Harmonia cuando los ia porta la corpo de Penteo. El ia mori en Epiro, do el ia es enterada en un bosceta cual ia deveni santa e la pais ia es nomida per el.
  • Erato (EL Ἐρατώ) — Musa de poesia de ama.
  • Erebo (EL Ἔρεβος) — La dio de oscuria.
  • erinias (EL Έρινύες) — Divas de venja. Los es tre sores: Alecto, Megera e Tisifone.
  • Eris (EL Ἔρις) — Spirito de disputa, desacorda, compete e luta.
  • Eros (EL Ἔρως) — La dio de ama.
  • Esculapio (LA Aesculapius) — Vide Asclepio.
  • Eteocle (EL Ἐτεοκλῆς) — Fio de Edipo e Iocasta. Maldiseda par sua padre, el ia mori en combate contra sua frate per la controla de Tebas.
  • Eter (EL Αἰθήρ) — La dio elinica de la aira superior.
  • Euristeo (EL Εὐρυσθεύς) — Re de Tirinto, fio de Stenelo e Nicipe, sposo de Antimaca. Hera ia fa ce el nase pos sola sete menses, per deveni re de Micene. Hercule ia debe labora per el tra des-du anios per deveni nonmortal. Pos la mori de Hercule, el ia persegue sua fios, ci ia refuja se en Atina. Pos un gera, Euristeo ia fuji e es matada par Hilo.
  • Euro (EL Εὖρος) — La venta este o sude-este.
  • Europa (EL Εὐρώπη) — Un prinsesa fenisia saisida e portada a Criti par Zeus.
  • Euterpe (EL Ευτέρπη) — Musa de musica.

F Edit

  • Fama (LA Fama) — Diva roman de fama e rumor.
  • Faustulo (LA Faustulus) — La pastor ci ia trova la jemelos Romulo e Remo tetida par la lupo fema sur la Colina Palatino. Con sua fema Acca Larentia, e ia eleva la enfantes.
  • Fedra (EL Φαίδρα) — Fio de Minos e Pasifae, sore de Ariadna. El ia es saisida par Teseo pos cuando el ia abandona sua sore.
  • Fenix (EL Φοῖνιξ) — Un geror acean vea, multe fidada par Acile, ci ia ata como reconsilior entre Acile e Agamemnon.
  • Filotete (EL Φιλοκτήτης) — Fio de la re Peante de Tesalia. Un arcor famosa, el ia combate per la aceanes en la Gera de Troia.
  • Fineo (EL Φινεύς) — Fio de Agenor e Telefasa. El ia ave du sposas, Cleopatra e Idea de Tracia. El ia sacrifia sua vive per pote vive plu. Helios, colerida par esta, ia envia la harpias per susi sua comeda cuando el ia atenta come lo. El ia aida la argonautas, disente a los ce, per traversa la Simplegades, los debe relasa un pijon e, si esta susede pasa, ance la barcon de la argonautas va pote traversa.
  • flamen (LA flamen) — Un prete de la relijio roman antica, asiniada a un de la des-sinco dios con culto ofisial en la Republica Roman.
  • Flegeton (EL Φλεγέθων) — Un de la sinco rios de enferno.
  • Flora (LA Flora) — Diva de flores.
  • Fobo (EL Φόβος) — Spirito de panica e fuji.
  • Fortuna (LA Fortuna) — Diva de fortuna.
  • Frixo (EL Φρίξος) — Fia de Atama e Nefele, ci ia fuji de sua estramadre Ino con sua sore Hele, portada par un ovea con lana de oro. El ia ariva a Colcis, ia sacrifia la ovea e ia suspende la Lana de Oro de un arbor.

G Edit

  • Galatea (EL Γαλάτεια) — Un nereide par ci la siclope Polifemo ia es enamada ma ance rejetada. Venjante, Polifemo ia mata Acis, la amor de Galatea. Galatea ia muta Acis a la rio Acis, en Sisilia.
  • Gea (EL Γαῖα) — La diva de la tera ("Madre Tera").
  • Gerion (EL Γηρυων) — Un jigante ci ia abita un isola do la sol reposa a la fini de la tera. El ia es matada par Heracle, ci ia vade per prende sua boves.
  • gorgones (EL Γοργόνες) — Monstros ci ia ave serpentes vivente en loca de capeles. Cualcun ci ia vide los ia es cambiada a petra. Los ia es tre sores: Euriale, Medusa e Steno.
  • gratias (LA Gratiae) — Divas roman de encanta, belia, natur, creosia umana e fertilia.

H Edit

  • Hades (EL Ἅιδης) — La dio elinica de la mundo suteran (la enferno).
  • hamadriades (EL Ἁμαδρυάδες) — Nimfas de la arbores ci, nonsimil a la driades, ia pertine a sola un arbor e ia mori cuando esta arbor ia es taliada.
  • Harmonia (EL Ἁρμονία) — Diva de armonia e acorda, sposa de Cadmo e madre de Polidoro, Semele, Ino, Agave e Autonoe.
  • Harpia — Un monstro con testa de fem e la corpo, alas e garas de avia xasante.
  • Hebe (EL Ἥβη) — La diva elinica de jovenia.
  • hecatonceres (EL Ἑκατόγχειρες) — Jigantes, fios de Urano e Gea, con sento brasos.
  • Hector (EL Ἕκτωρ) — Un eroe troian matada par Acile en la gera de Troia. Fio de la re Priamo e la rea Hecuba, sposo de Clitemnestra.
  • Hefesto (EL Ἥφαιστος) — la forjor elinica de la sielos.
  • Hele (EL Ἕλλη) — Fia de Atama e Nefele. El ia fuji de sua estramadre con sua frate Frixo sur la ovea con lana de oro, ma ia cade en la mar cual es oji nomida Helesponte en sua onora.
  • Helena (EL Ἑλένη) – Rea de Sparta, descriveda como la fem la plu bela de mundo. Sposida con la re Menelao, el ia es saisida par la prinse Paris de Troia cuando la diva Afrodite ia promete ce Helena va ama el pos la judi de Paris. Esta ia comensa la gera de Troia. El ia es fia de Zeus e Leda.
  • heliadas (EL Ἡλιάδαι) — Fios de Helios e Rodo e netos de Posedon, frates de Electrione.
  • Helio (EL Ἥλιος) — Titan de la sol e gardor de juras.
  • Hera (EL Ἥρᾱ) — La rea elinica de la sielos.
  • Hermes (EL Ἑρμῆς) — La mesajor elinica de la sielos, e dio de furores.
  • Hersilia — Sposa de Romulo. El ia aida fini la gera entre la romanes e la sabines.
  • hesperides (EL Ἑσπερίδες) — Melides ci ia cura la jardin situada en un loca a ueste de la mundo. Los ia es nimfas de ueste, de la sera, e de la lus orosa de reposas de sol.
  • Hestia – La diva elinica de la ximineria.
  • hiades (EL Ὑάδες) — Nimfas de pluve.
  • hibris (EL Ὕβρις) — La spirito de condui scandalosa.
  • Hilo (EL Ὕλλος) — Fio de Hercule e Deianera. El ia mata Euristeo e ia vade a Tesalia, do Egimio, asendente de la dorianes, ia adota el e ia dona a el un tri de sua teritorio. Pos la mori de Egimio, sua du fios ia dona a Hilo la otra partes de la teritorio, tal ce Hilo ia deveni la re de la dorianes.
  • Hipermnestra — La sola danaide ci no ia mata sua sposo Linceo en la note de sposi.
  • Hipno (EL Ὕπνος) — La dio de dormi. Jemelo de Tanato.
  • Hipolita — Fia de Ares e Otrere. Famosa per sua sintur majiosa, cual Hercule ia debe prende en sua taxe nove.
  • Hipseo (EL Ὑψεύς) — Re de la lapitas, fio de Peneo e de la naiade Creusa. Sposo de Clinadope, con ci el ia ave cuatro fios, Temisto, Astiagia, Alcea e Cirene.
  • horas (EL Ώρες) — Divas de la ordina natural.
  • Horco (EL Ὅρκος) — La spirito de juras.

I Edit

  • Ialemo (EL Ιάλεμος) — Fio de Apolon e Caliope e frate de Himeneo. Inventor de un tipo de canta de tristia.
  • Ialmeno (EL Ἰάλμενος) — Fio de Ares e Astioce, jemelo de Ascafalo. Corteor de Helena, el ia debe, par sua jura, vade a la Gera de Troia per recovre el. Cuando el ia reveni de la gera, el ia fundi un colonia en Ponto Euxino. El ia es un de la argonautas.
  • Iambe (EL Ἰάμβη) — Fia de Pan e la nimfa Eco. El ia es la servor de casa de Metanira, sposa de Hipotoon. Cuando Demeter ia pasa xercante Persefone, sua bromas ia fa ce la diva rie.
  • Iason (EL Ἰάσων) — Gidor de la argonautas, ci ia viaja per reprende la Lana de Oro de Colcis distante.
  • Icaro (EL Ἴκαρος) — Fio de Dedalo. El ia fuji de la labirinto de Criti, volante con alas fabricada de plumas e sira, ma el ia vola tro prosima a la sol, fondente la sira, e ia cade en la Mar Ejeo, do el ia afoca.
  • Ida, Monte (EL Ἴδη) — (1) Un monte santa en Criti, do Zeus ia es ascondeda de sua padre Crono. (2) Un monte santa, prosima a Troia, do Ganimede ia es saisida par Zeus.
  • Idra de Lerna (EL Λερναῖα Ὕδρα) — Un serpente con multe testas cual ia recrese si on ia talia los a via. Fia de Tifon e Ecidna, Hercule ia mata lo con la aida de sua sobrino Iolao.
  • Ifigenia (EL Ἰφιγένεια) — Fia de la re Agamemnon e la rea Clitemnestra, prinsesa de Micene. Agamemnon ia sacrifia el a Artemis per pasi la diva.
  • Inaco (EL Ἴναχος) — Fio de Oceano e Tetis, sposo de Melia e padre de Io e Foroneo.
  • Ino — Fia de Cadmo e Harmonia, sposa du de Atama, madre de Learce e Melicerte e estramadre de Frixo e Hele.
  • Io — Fia de Inaco e Melia, ci ia es mutada a un bove fema cuando los ia es descovreda par Hera. La diva ia demanda per la bove fema de Zeus e ia es vijilada par Argo Panopte.
  • Iolao (EL Ἰόλαος) — Sobrino de Heracle, fio de Ificle e Automedusa. El ia acompania sua tio en sua laboras e ia gida sua caro de gera.
  • Iole (EL Ἰόλη) — Fia de Euripo, re de Ecalia. La re ia ofre el como premio en un concurso de xuta con arco cual Heracle ia gania, ma la re ia refusa dona el a la eroe, temente ce Heracle va deveni denova fol e va mata la fios ci el ta ave con Iole. Pos sabe esta, Deianera ia envia la capa cual ia deveni la causa de mori de Heracle.
  • Iris (EL Ίρις) — Mesajor fema de la dios.

J Edit

  • Jano (LA Iānus) — La dio de comensas, finis, tempo, portes, pasajes e traversas. El ia ave du testas.
  • jigantes (EL Γίγαντες) — Desendentes de Gea, naseda de la sangue de Urano cuando el ia es castrada par sua fio Crono.
  • Jigantomacia (EL γιγαντoμαχια) — un luta entre la dios e la jigantes per la governa de la universo, ganiada par la dios.
  • Juno (LA Iūnō) — Rea de la dios e la diva de sposi.
  • Jupiter (LA Iuppiter) — Re de la dios e la dio de tempestas, la aira e la sielo.
  • Juturna (LA Iuturna) — Diva de fontes. Sposa de Iano e madre de Fonto, Jupiter ia converti el a un naiade e ia dona a el un fonte santa en Lavinio, e un otra prosima a la templo de Vesta en la Foro Roman.

L Edit

  • Lacedemon (EL Λακεδαίμων) — Fio de la pleade Taigete e Zeus, sposo de la prinsesa Sparta e padre de la re Amicla de Sparta e de la rea Euridice de Argos.
  • Ladon (EL Λάδων) — Dragon con forma de serpente encargada a proteje la pomas orosa de la Jardin de la Hesperides.
  • Laerte (EL Λαέρτης) — Un argonauta ci ia partisipa en la xasa de la senglar calidonian. Padre de Odiseo e Ctimene, sposo de Anticlea.
  • lampades (EL Λαμπάδες) — Nimfas de la sumundo, acompaniores de Hecate. Los ia es un donada par Zeus per la suporta par Hecate en la Titanomacia.
  • Lana de Oro (EL χρυσόμαλλον δέρας) — La lana de un ovea mas con alas. Frixo e Hele, fios de Nefele e Atama, ia vola sur la ovea per fuji de un cultivor ci ia vole sacrifia los. Pos ariva a Colcis, Frixo ia sacrifia la ovea e ia pende sua lana de un arbor.
  • Laocon (EL Λαοκόων) — Un prete troian atacada con sua du fios par serpentes jigante enviada par la dios.
  • Laodice (EL Λαοδίκη) — La fia la plu bela de Priamo ci ia es enamada par Acamas, fio de Teseo.
  • Laomedon (EL Λαομέδων) — Re troian, fio de Ilo e Euridice.
  • lapitas (EL Λαπίθαι) — Un popla lejendal de Tesalia, ci ia abita en la Vale Peneo e la Monte Pelion.
  • lares (LA Lares) — Dios roman de la casa.
  • Leon de Nemea — Un leon cual ia abita en Nemea e cual Hercule ia debe mata en sua taxe prima.
  • lestrigonianes (EL Λαιστρυγόνες) — Un tribu de jigantes ci ia come persones e ci Odiseo ia encontra en sua viaja reveninte a Itaca.
  • Lete (EL Λήθη) — Un de la sinco rios de enferno.
  • Licaon (EL Λυκάων) — Un fio de Priamo e Laotoe.
  • licianes — Un popla aliada con la troianes.
  • limnades (EL Λιμνατιδες) — Naiades ci ia vive en lagos de acua dulse.
  • Linceo (EL Λυγκεύς) — Un re de Argos, ci ia segue Danao a la trono pos mata el.
  • Lupercal (LA Lupercal) — La cava locada en la pede sude-ueste de la Colina Palatino en Roma. Romulo e Remo ia es ala trovada par un lupo fema ci ia teti los asta cuando los ia es salvada par la pastor Faustulo.

M Edit

  • Macisto (EL Μάκιστος) — Fio de Atama e Nefele, frate de Frixo e Hele.
  • Marte (LA Mārs) — Dio de gera e la padre de Romulo, la fundor de Roma.
  • Mea (EL Μαῖα) — Un de la pleades. El ia es fia de Atlas e Pleone e madre de Hermes.
  • Medea (EL Μήδεια) — Un sorsor e sposa de Iason, ci ia mata sua propre fios per puni Iason per sua nonfidelia.
  • Melanipe (EL Μελανίππη) — Un amazona. Alga dise ce el ia es asasinada par Telamon.
  • Melia (EL Μελία) — Un miliade, fia de Urano e Gea. Con Inaco, el ia es la madre de Io e Foroneo.
  • Melpomene (EL Μελπομένη) — Musa de trajedia. Fia de Zeus e Mnemosine.
  • Memnon (EL Μέμνων) — Un re de Itiopia ci ia combate per la troianes en la Gera de Troia.
  • Meneceo (EL Μενοικεύς) — Fio de Penteo e padre de Creon, Iocasta e Hiponome.
  • Menelao (EL Μενέλαος) — Re de Sparta, sposo de Helena e fio de Atreo e Aerope. El ia gida la soldatos spartan, su sua frate major Agamemnon, en la gera de Troia.
  • Mercurio (LA Mercurius) — La mesajor de la dios e la portor de spiritos a la mundo suteran.
  • Micene (EL Μυκῆναι) — Un site elinica antica, situada en la Peloponeso. La site ia es fundida par Perso, neto de la re Acrisio de Argo, ci, pos mata sua avo sin intende, no ia vole erita la rena. El ia dona lo a sua cusino Megapente, en loca de ci el mesma ia deveni la re de Tirinto. Pos esta, el ia fundi un site capital, e Micene ia nase tal.
  • miliades (EL Μελιάδες) — Driades de la fresnos. Los ia nase de Gea cuando el ia es fertilida par la jenitales de Urano lansada par Crono. Los ia es sores de la furias, la jigantes e Afrodite. Los ia cura Zeus en Criti, donante a el la lete de la capra Amaltea.
  • Minerva (LA Minerva) — La diva de sajia e de gera.
  • Minos (EL Μίνως) — Re mital de Criti, fio de Zeus e Europa. Nomida como judor de la mores en la sumundo pos sua mori.
  • mirmidones (EL Μυρμιδόνες) — Un de la tribus ci ia acompania Acile, sua re, a la gera de Troia. Longo la mito, los ia es creada par Zeus de un colonia de formicas.
  • moiras — Personis de destina. Los ia controla la filo de vive de cada mortal. Los ia es tre: Cloto, Lacesi e Atropo.

N Edit

  • naiades (EL Ναϊάδες) — Nimfas de acuas dulse.
  • Nefele (EL Νεφέλη) — Nimfa de la nubes, sposida con Atama. Sua sposo ia divorsa el per sposi Ino. Sua fios ia es Frixo e Hele.
  • Nemesis (EL Νέμεσις) — Diva de venja e coleria virtuosa.
  • Neoptolemo (EL Νεοπτόλεμος; ance nomida Pirro Πύρρος) — Fio de Acile e la prinsesa Deidamia. Asendente de la dinastia gidante de la molosianes en Epiro antica.
  • nereides (EL Νηρηίδες) — La sincodes fias de Nereo e Doris, sores de Nerite. Los ia es nimfas maral.
  • Nereo (EL Νηρευς) — Fio la plu vea de Ponto e Gea, padre de la Nereides e Nerite.
  • Nerite (EL Νερίτης) — Fio de Nereo e Doris e frate de la Nereides.
  • Netuno (LA Neptūnus) — La dio de la mar, de tremas de tera, e de cavalos.
  • Nike (EL Νίκη) — Diva de vinse.
  • Nix (EL Νύξ) — Diva de la note.
  • Noto (EL Νότος) — Venta sude.

O Edit

  • oceanides (EL Ωκεανιδες) — La nimfas maral, fias de Oceano e Tetis.
  • Odiseo (EL Ὀδυσσεὺς; Ulise per la romanes) — Un eroe elinica, re de Itaca. Sposo de Penelope, padre de Telemaco, e fio de Laerte e Anticlea, el es conoseda per sua brilia inteletal e sua viaja reveninte a sua casa, cual ia ocupa 10 anios pos la cade de Troia.
  • Ofion (EL Όφίων) — Un titan vinseda par Crono en un combate e enviada a Tartaro. Sposo de Climene.
  • Olimpo, Monte (EL Όλυμπος) — Un monte en Elas, abitada par la dios elinica.
  • Opi (LA Ops / Opis) — La diva de abunda.
  • oreades (EL Ὀρειάς) — Nimfas ci ia proteje la montes. Los difere entre se par sua abita.
  • Oreste (EL Ὀρέστης) — Fio de Clitemnestra e Agamemnon.
  • Orfeo (EL Ὀρφεύς) — Musiciste, poesiste e profeta. El ia vade a enferno per atenta, sin susede, reprende sua sposa Euridice.
  • Otrere (EL Οτρηρη) — Rea de la amazonas. Fia de Euro e sposa real de Ares e madre de Hipolita, Antiope, Melanipe e Pentesilea.

P Edit

  • Palas (EL Πάλλας) — Un jigante despelida par Atena, ci ia usa sua pel como scermo.
  • Panacea (EL Πανάκεια) — Diva de sania.
  • Pandaro (EL Πάνδαρος) — Un arcor ci ia feri Menelao con sua flexas.
  • Pandora (EL Πανδώρα) — La umana fema prima, creada par Hefesto seguente instruis de Zeus. Longo la mitolojia elinica, Pandora ia abri un caxa, librinte tota la males de umania. Asustada, el ia clui la caxa, lasante sola la esperia a interna.
  • Pantariste (EL Πανταρίστη) — Un amazona ci ia combate con Hipolita contra Heracle.
  • Paris (EL Πάρις) — Prinse troian, fio de Priamo e frate de Hector. Sua saisi de Helena ia es la causa de la comensa de la Gera de Troia. El ia ta debe es matada cuando el ia es un bebe, car sua sore Casandra ia predise ce el va causa la destrui de Troia, ma el ia es elevada par un pastor.
  • Patroclo (EL Πάτροκλος) — Acompanior e ami de Acile, de ci sua mori par Hector en la Gera de Troia ia fa ce Acile entra a la batalia.
  • pegasides (EL Πηγασίδες) — Nimfas liada a posos e fontes, ci ia nase cuando Pegaso ia colpa la solo con sua ungulas.
  • Pegaso (EL Πήγασος) — Un cavalo volante con alas, ci ia nase de la sangue de Medusa pos sua destesti par Perseo. El ia es montada par Belerofon cuando el ia mata la Cimera.
  • pegeas (EL Πηγαῖαι) — Nimfas de cascades.
  • Peleo (EL Πηλεύς) — Un eroe mital elinica, fio de Eaco e Endeis, frate de Telamon e padre de Acile.
  • Penelope (EL Πηνελόπη) — Sposa de Odiseo, ci es conoseda per sua fida a Odiseo cuando el ia es asente, an con tota sua corteores.
  • Penteo (EL Πενθεύς) — Re de Tebas, fio de Ecion e Agave, frate de Epiro, padre de Meneceo. El ia proibi la culto a Dioniso; como puni, la dio ia envia sua madre e sores a Monte Citeron en rituo. Dioniso, desemblada como fema, ia tenta el a oserva, disente ce los es sesal ativa. La femes, pensante ce el es un animal, ia mata el, desmembrinte sua corpo.
  • Pentesilea (EL Πενθεσίλεια) — Un rea de la amazonas e fia de Ares e Otrere. El ia aida la troianes en la Gera de Troia, do el ia es matada par Acile.
  • Persefone (EL Περσεφόνη) — La diva elinica de primavera e de moria.
  • Perseo (EL Περσεύς) — Un geror mitolojial elinica ci ia mata Medusa par destesti el. Fio de Zeus e Danae.
  • Pira (EL Πύρρα) — Fia de Epimereo e Pandora e sposa de Deucalion.
  • Piton (EL Πύθων) — Un serpente ci ia garda la oraculo de Delfi. El ia es matada par Apolon.
  • pliades (EL Πλειάδες) — La sete fias de Atlas e la nimfa Pleone. Los es nimfas ci acompania Artemis.
  • Pluto (EL Πλούτων) — La re de la mores.
  • Polemo (EL Πόλεμος) — La personi de gera.
  • Polibote (EL Πολυβώτης) — Un de la jigantes ci ia combate la dios. El ia es matada par Posedon.
  • Polidama (EL Πολυδάμας) — Un comandor joven troian, ami de Hector.
  • Polinece (EL Πολυνείκης) — Fio de Edipo e Iocasta. Maldiseda par sua padre, el ia mori en combate contra sua frate Eteocle per la controla de Tebas.
  • Pomona (LA Pōmōna) — Diva de arbores de fruta.
  • Ponto (EL Πόντος) — Dio preolimpial de la mar. Sposo de Talasa.
  • Porfirion (EL Πορφυρίων) — Un de la gidores de la jigantes, matada par Zeus.
  • Portuno (LA Portunus) — Dio de claves, portes e bestias.
  • Posedon (EL Ποσειδῶν) — La dio elinica de la mares.
  • potamides (EL Ποταμηΐδες) — Naiades de rios, fias joven de la dios-rios. Los ia sutrae la puntetas de la pel de femes joven baninte en sua acuas.
  • Prados de Asfodelos — La loca en la enferno do la spiritos comun ia vade pos mori.
  • Priamo (EL Πρίαμος) — Re de la troianes, fio e seguor de Laomedon, sposo de la rea Hecuba, padre de Hector e Paris. El ia es tro vea per combate en la gera de Troia.
  • Proserpina (LA Prōserpina) ­— Diva de la mor e de gran.
  • Psice (EL Ψυχή) — La personi de la spirito.

R Edit

  • Rea Silvia (LA Rhea Silvia; ance nomida Ilia) — Madre mital de Romulo e Remo, la fundores de Roma.
  • Remo (LA Remus) — Fio de Rea Silvia e la dio Marte, jemelo de Romulo. El ia es matada par sua frate en un disputa sur la loca do la site va es fundida. Cuando Romulo ia jura mata cualcun ci traversa la limitas de la loca santida par el, Remo ia burla e ia traversa los, e ia es matada par sua frate.
  • Reso (EL Ῥῆσος) — Re de Tracia ci ia aida la troianes en la Gera de Troia. Odiseo e Diomede ia fura sua cavalos e el ia es matada par la eroes acean.
  • Rode (EL Ῥόδη) — Diva maral, la personi de la isola Rodos. Fia de Posedon e Halia e sposa de la dio Helio.
  • Romulo (LA Romulus) — Fio de Rea Silvia e la dio Marte, jemelo de Remo, fundor de la site Roma.

S Edit

  • Sarpedon (EL Σαρπηδών) — Re de Licia, fio de Jupiter, matada par Patroclo.
  • Saturno (LA Saturnus) — Un titan, dio de la recolie e cultiva, la padre de Jupiter, Netuno, Juno e Pluto.
  • Scamandro (EL Σκάμανδρος; ance nomida Xanto Ξάνθος) — Un rio prosima a la site Troia. Lo ia combate per la troianes en la gera.
  • Scila (EL Σκύλλα) — Un monstro cual ia abita en un canal streta de acua, a fas de Caribdis.
  • Selene (EL Σελήνη) — Diva elinica de la luna.
  • Semele (EL Σεμέλη) — Fia de Cadmo e Harmonia, madre de Dioniso.
  • Sentauro (EL kένταυρος) — Un esente mitolojial con la corpo de un cavalo e un testa umana.
  • Simoes (EL Σιμόεις) — Un rio troian, afluente de la Scamandro.
  • simplegades (EL Συμπληγάδες) — Rocas situada en la Bosforo cual ia colide entre se asta cuando la argonautas ia susede traversa los.
  • Sisifo (EL Σίσυφος) — La re de Efira ci ia es punida per sua egosia par es obligada a rola un rocon a la apico de un monte. Sempre cuando el ia es cuasi arivante, la rocon ia cade e el ia debe comensa denova.
  • Stix (EL Στύξ) — Un de la rios de enferno.

T Edit

  • Taigete (EL Ταϋγέτη) — Nimfa, un de la pleades, fia de Atlas e Pleone. Madre de Lacedemon.
  • Talasa (EL Θάλασσα) — Diva esensal de la mar e la personi de la Mar Mediteraneo. Sposa de Ponto e madre de la Telcines, de la nimfa Halia e de la pexes.
  • Talia (EL Θαλία) — Musa de comedia. Fia de Zeus e Mnemosine.
  • Talo (EL Τάλως) — Un jigante forjada de bronze par Hefesto e donada par Zeus a Europa como sua protejor personal.
  • Tanato (EL Θάνατος) — La personi de moria e mortalia. Jemelo de Hipno.
  • Tantalo (EL Τάνταλος) — Re frigian, condenada a resta en Tartaro, sumerjida asta sua mento, con ramos con frutas pendente supra sua testa; sempre cuando el ia atenta come o bevi, la acua e frutas ia move estra sua ateni.
  • Tartaro (EL Τάρταρος) — Un parte oscur de la rena de Hades, reservada per la condenas de malvolentes, como la titanes.
  • Tauma (EL Θαύμας) — Fio de Ponto, ci ia sposi Electra, fia de Oceano, con ci el ia ave la fias Iris e la Harpias.
  • Teano (EL Θεανώ) — Prete fema de Atena en Troia e sposa de Antenor.
  • Tecne (EL Τέχνη) — La personi de arte e capasia.
  • Telamon (EL Τελαμών) — Fio de Eaco e Endeis, e frate de Peleo. El ia viaja con Iason como un argonauta.
  • telcines (EL Τελχῖνες) — Abitores orijinal de la isola Rodos.
  • Telefasa (EL Τηλέφασσα) — Naiade, fia de la dio-rio Nilo, e sposa de Agenor, con ci el ia ave alga fios (Fenix, Cilix, Cadmo, Europa e Fineo).
  • Telegono (EL Τηλέγονος) — fio de Odiseo e Circe. Cuando el ia crese, Circe ia envia el per xerca sua padre. Cuando el ia ariva a Itaca, pensante ce lo es Corcira, el ia comensa saca la isola car el ia es fame. Odiseo e Telemaco ia vade per defende la isola e Telegono ia mata sua padre sin intende. Gidada par Atena, el ia vade a Ea, do el ia intera la corpo. El ia prende Telemaco e Penelope e ia porta los a la isola de sua madre. Circe ia sposi Telemaco e Telegono ia sposi Penelope, con ci el ia ave un fio, Italo, ci ia dona sua nom a Italia.
  • Telemaco (EL Τηλέμαχος) — Fio de Odiseo e Penelope. El ia combate con sua padre contra la corteores de sua madre.
  • Temis (EL Θεμις) — Titan fema elinica. El es la personi de la ordina divin, justia, lege e costum.
  • Terpsicore (EL Τερψιχόρη) — Musa de dansa e coros. Fia de Zeus e Mnemosine.
  • Teseo (EL Θησεύς) — Un eroe elinica antica, conoseda per vinse la minotauro en la labirinto de Criti.
  • Teucro (EL Τεῦκρος) — Fio de Telamon (re de la isola Salamis) e sua sposa du, Hesione, fia de Laomedon de Troia. El ia combate con sua duifrate Aiax maior en la gera de Troia.
  • Tice (EL Τύχη) — Diva de fortuna, favore divin e destina.
  • Tifon (EL Τυφών) — Un serpente jigante e la esente la plu matante en la mitolojia elinica.
  • Titan (EL Τιτάν) — Cualce de la dios de Elas antica ci ia presede la olimpianes. Los ia es 12: Mnemosine, Tetis, Teia, Febe, Rea, Temi e Oceano, Hiperion, Ceo, Crono, Crio e Iapeto.
  • Titanomacia (EL Τιτανομαχία) — Un gera de des anios fada en Tesalia entre la plu de la titanes e la dios olimpian. En esta gera on ia deside ci va governa la universo, e la dios ia vinse.
  • Traso (EL Θράσος) — La spirito de osa.
  • Triton (EL Τρίτων) — Un dio de la mar.
  • Tro (EL Τρώς) — La fundor de la site Troia.
  • Troia (EL Τροία / Τροίας, LA Troia; ance conoseda como Ilion / Ilios Ἴλιον, Ἴλιος, Ilium) — Un site situada en Anatolia entre la rios Scamandro e Simois. Lo es conoseda per la Gera de Troia, entre aceanes e troianes, en cual la aceanes ia concista e ia destrui la site pos des anios de gera. Sua murones ia es construida par Posedon e Apolon.
  • Troilo (EL Τρωΐλος) — Fio de la re Priamo e Hecuba, prinse de Troia. Sua destina ia es liada a lo de la site e, par esta razona, Acile ia mata el.
  • Turno (LA Turnus) — Re de la rutulos cuando Enea ia ariva a Italia. Fio de Dauno e la nimfa Venilia, e neto de Pilumno. Corteor de Lavinia, fia de Latino. Cuando la re ia dona sua fia a Enea, el ia deside ataca la troianes. Pos un batalia prima, Turno ia fuji a la tera de la re Menenzio, do el ia demanda aida. El ia ataca denova Enea, ma ia mori.

U Edit

  • Ulise (LA Ulysses) — Vide Odiseo.
  • Urania (EL Οὐρανία) — Musa de astronomia.
  • Urano (EL Οὐρανός) — Dio de la sielo.

V Edit

  • ventas (EL Άνεμοι) — Dios de la ventas.
  • Venus (LA Venus) — Diva de ama e belia, madre de la eroe Enea.
  • Vesta (LA Vesta) ­— Diva de la ximineria e la stato roman.
  • Volturno (LA Volturnus) — Un dio de acua.
  • Vulcan (LA Vulcānus) — Dio de la foco, forja e forjores.

X Edit

  • Xanto (EL Ξάνθος) — Vide Scamandro.

Z Edit

  • Zacinto (EL Ζάκυνθος) — Un arcadian de la site Psofis, ci ia fundi un colonia en la isola Zacinto.
  • Zagreo (EL Ζαγρεύς) — Fio de Zeus e Persefone, ci ia es desmembrida par la titanes e ia renase a pos.
  • Zefiro (EL Ζέφυρος) — La venta ueste.
  • Zelo (EL Ζῆλος) — Spirito de compete zelosa e jelosia.
  • Zeus (EL Ζεύς) — La re elinica de la sielos.
  • Zeuxipe (EL Ζευξίππη) — Un naiade, sposa de Pandion 1 e madre de Erecteo, Bute, Procne e Filomena.
  • Zeuxo (EL Ζευξώ) — Un oceanide.
Community content is available under CC-BY-SA unless otherwise noted.